Қаражанбасмұнайлықтар ең дәмді наурыз көжені анықтады

Жарысқа әр департамент ерекше дайындалды: олар ұлттық киім киіп, төс қағыстырып көрісті, ұлттық тағамдардан дәм татты, ән айтып, күй тартып, салт-дәстүрге сай көріністер көрсетті. Мерекелік атмосфера жұмысшыларға жарқын эмоция сыйлады, ал қатысушылар шеберлігін қазылар алқасы бағалады.

«Ұзақ үзілістен кейін біз басты мерекелер – Амал мен Наурызды кең көлемде атап өтіп жатырмыз. Ғасырлар бойы ол адамдарды бірлікке шақырып, қуаныш пен жылулық сыйлап келеді. ҚБМ қызметкерлері өте жақсы дайындалып, шығармашылық шеберлігін паш етті», – деп атап өтті қазылар алқасының мүшелері.

Мысалы, заң департаменті қазақ халқының қонақжайлылығын көрсетті. Технологиялық көлік департаменті «Тұсау кесу» рәсімін өткізді. Өзге департаменттер де кең дастархан жайып, ұлттық тағамдар мен ежелгі бұйымдар тарихынан сыр шертті.

Сайыс қорытындысы бойынша сатып алу және материалдық техникалық жабдықтау департаменті «Ең қонақжай департамент» атанды. Ал «Ең дәмді наурыз көже» дайындау бойынша әкімшілік-шаруашылық жұмыстар департаменті үздік деп танылды.